EHBAI, IPAR EUSKAL HERRIKO BIGARREN INDAR POLITIKOA

2021eko departamendu bozetako lehen itzuliko emaitzek EHBAI bigarren indar politiko gisa ezarri dute. Emaitza hauek onak izanik ere, apaltasunez hartu behar ditugu abstentzio tasa handia izan baita.

Emaitza hauek herritarrekiko erantzukizun berriak hartzera behartzen gaituzte, hautatuko den gehiengoan eta eramanen diren politika publikoetan azkarki eragin beharko baitugu.

EHBai-rentzat eskuineko eta zentroko hautagaiak sustengatzea ezinezkoa den gisan, pentsaezina da ere Iparraldearen instituzionalizatze prozesuaren kontra eta euskararen ezagupen ofizialaren kontra posizionatzen den ezkerra sustengatzea.

Atzo lortu emaitzei esker, 7 kantonamendutan aurkezten ahalko gara bigarren itzulian (*). Joan den igandean bozkatzera joan ez direnei eta beste hautagaitza baten hautua egin dutenei zuzendu nahi dugu. Bigarren itzulia parada ezinhobea da egungo gehiengoa kanporatu eta eramaten dituen politikak gelditzeko, eta ezker, abertzale, ekologia eta feminista alternatibak urrunago eramateko. Present izanen garen kantonamendu guzietan jendea EHBAI bozkatzera deitzen dugu, justizia soziala gehiago izateko, trantsizio ekologikoan aitzinatzeko, bake prozesuan urrats berriak emateko, Iparraldeko instituzioa sendotzeko eta euskararen eta gaskoieraren aldeko hizkuntza politika ausartagoak bideratzeko.

Horrez gain, EHBAI bozkatzea, etxebizitza ukatearen aldeko eskubidea azkarrago aldarrikatzea da eta gutxieneko errenta bermatuaren alde egitea.

Bigarren itzulian izanen ez den beste 5 kantonamenduetan, EHBAI-k hautesleak deitzen ditu ongi begiratzera ezkerreko eta ekologia hautagaitzen artean zein diren gorago aipatu puntuak hobekien defendatzen dituztenak, Ana Ezcurra eta Mathieu Castaings binomoak Biarritzeko kantonamenduan egiten duen bezala adibidez.

Emaitzaz haratago, EHBAI bozkatzea egunerokotasunean eraikitzen ditugun alternatibak eta eramaten ditugun borroka sozialak sendotzea da.

(*) Hendaia, Bidaxune, Euskal Mendia, Uztaritze, Donibane Lohizune, Baigura Mondarrain eta Errobi-Aturri

EHBAI ZAZPI KANTONAMENDUTAN HELDU DEN IGANDEAN

Hauteskunde departamentalen emaitzak publiko egin dira eta EHBai presente izanen gira heldu den igandean, 7 kantonamendu desberdinetan  (2015ean bost kantonamendutan izan ginen): Hendaiako Kantonamendua; Donibane Lohizune; Bidaxune-Amikuze-Oztibarre; Uztaritze-Errobi-Urdazuri; Errobi Aturri; Baigura Mondarraine eta Euskal Mendia. Emaitza positibo horien artean, Hendaiako kantonamenduan, lehenak girela nabarmendu behar dugu. EHBai, ipar Euskal Herriko 12 kantonamenduetan aurkeztu den indar politiko bakarra gira. Ipar Euskal Herria ordezkatzeko ahalmena duen mugimendua. Nahiz eta abstentzioak gora egin, gure emaitzak gora egin dute 2015eko bozekin konparatuta.

EHBai-k lortutako emaitza horiek, azken urteetan eramandako lanari esker dira eta azken hauteskunde munizipaletan abertzaleek lortutako emaitza onen segida. Kolektiboki lortutako emaitza da. Urratsez urrats eta urtez urte, abertzaleek defenditzen dituzten ideiak geroz eta sustengu gehiago lortzen dute jendartean.

Heldu den igandean, lehen itzulian EHBai-ri erakutsitako atxikimendu bera izanen dugula espero dugu. Gaur, ezkerreko alternatiba sinesgarria girela frogatu dugu eta mobilizazio azkarrago batetara deitzen dugu.

Milesker EHBai-ren alde bozkatu duzuen guziei.

Laborantza politika berri baten alde

Pentsa daiteke Laborantxa Politika Bateratua (LPB-PAC) laborarien afera beizik ez dela. Alta ondorio zuzen ainitz baditu egunero gure plateretan atxemaiten dugunarekin.

Azken hamarkadetan, laborantxak kanbiamen frango ezagutu ditu, batzuk onerako eta beste batzuk txarrerako. Laborariak produktibismoan sartzera pusatu ditu LPBak, etxaldeak gero eta haundiagoak izanez, gero eta laborari gutiagorekin eta ekoizpenak kopuru haundian ateraz prezioa egin ahala apal izaiteko. Modelo hau bere mugetara heldua da, errepikatzen ari diren krisi sanitarioak lekuko, laborarien bizi eta lan baldintzak hobetuz abian ez diren bitartean. Memento honetan eztabaidatzen ari diren, eta ondoko urteendako ondorioak ukanen dituen, Laborantxa Politika Bateratuak hainbat erronkeri buru egin beharko die, izan sozialak, ekonomikoak edo ingurumenari lotuak. Frantziako laborantxa ministroaren lehen adierazpenek ez dituzte erronka horiek batere kondutan hartzen, ministroa den egoerarekin konformatzen balitz bezala.

EHBai gisa, gure aldetik ere laborantxa politika berritu bat aldarrikatu nahi dugu, laborarier bizi duin bat segurtatzen duena, oroer kalitatezko elikadura bermatzen duena, baliabide naturalak babestuz eta ingurumena zainduz. Euskal Herrian, Iparraldean, ezagutzen ditugun eta hain famatuak diren bazter, paisai eta kalitatezko mozkinak etxalde ttipi eta laborari ainitzer esker ditugu.

EHBaik bihar goizean, goizeko 10ak30tan ELB sindikatak eta BLE elkarteak Baionako suprefetura aintzinean antolatzen duten elgarretaratzera deitzen du tokiko eta kalitatezko elikaduraren alde, herriak bizirik atxikitzearen alde eta lurraldeko zutabe ekonomiko garrantzitsu bat xutik mantentzearen alde.

Eraso gehiagorik ez!

Joan den ostiralean, Baionan, gizon batek fisikoki erasotu du bere bikote kide ohia.

Nahiz eta bananduak izan, gizona bere bikotea izandakoaren etxera joan zen. Eztabaida fite eraso bilakatu zen.

Emaztearen auzokoek izandako jarrera txalotzen dugu. Izan ere, biziki fite erreakzionatu dute eta emaztea artatu ahal izan dute. Horri esker eta jasan behar izan duen ebakuntza ongi pasa delako, emaztea lanjeraz kanpo dago.

Gaurkoan, eta maleruski beste behin ere, gizonaren eginkizunak salatzen ditugu. Gaur pasako da epailearen aitzinetik eta espero dugu, emazteak pausatutako salaketaren poderioz, gogorki zigortua izanen dela.

Frantziar estatu mailan, urtero 100 emazte baino gehiago hiltzen dira beren bikote kide edo bikote kide ohiaren eskutik. Urtean 250000 emaztek, gisa desberdinetako erasoak pairatzen dituzte. Xifre beldurgarriak. Bada garaia zinezko neurriak hartzeko.

Bukatzeko, gure babesa eta sustengua adierazi nahi dizkiogu erasoa pairatu duen emazteari.