Korsikarako erreforma konstituzionala: Korsikako herriarentzat eta estaturik gabeko nazioentzat aitzinamendu garrantzitsua!

Ekainaren 23ko astearte honetan, Frantziako Asanblea Nazionalak Korsikaren autonomiarako konstituzio-lege proiektua onartu du. EHBaik bozketa honen garrantzia azpimarratu nahi du, Korsikaren eta Frantziako Estatuaren artean abiaturiko prozesuan urrats garrantzitsua baita. Izan ere, lehen aldiz, Frantziako Estatuak metropoliko lurralde baten lurralde mailako arauzko ahalmena eta errealitateetara arauak egokitzeko gaitasuna aitortzen ditu. Bilakaera horrek ikuspegi berri bat idekitzen du: Estatua lurraldeek demokratikoki adierazitako behar eta borondatera egokitzeko posibilitate erreal bat.

Aitzinamendu honek, halaber, erakusten du posible dela aldarrikapen kultural, instituzional edo linguistikoen aitzinean usu erabiltzen den «konstituzioaren aurkakotasunaren» argudio errepikakorra gainditzea. Berretsi egiten du autonomia-estatutu bat aukera politiko bat dela, eta Frantziako Estatuan bere lekua izaten ahal duela eta izan behar duela, haren izaera plurinazionalaren aitortuz.

Hala ere, adi segitzea beharrezkoa da. Izan ere, disposizio zehatz askoren garapena oraindik idaztekoa den etorkizuneko lege organiko batean jaso behar dira. Beraz, bada arriskua nagusiki sinbolikoa izanen den edo zinezko eskumen nahikorik izanen ez duen estatus bat sortzeko. Gainera, Korsikako komunitateari, haren berezko identitateari eta bere lurraldearekin duen lotura bereziari buruzko erreferentziak nabarmen ahuldu dira parlamentuko eztabaidetan zehar.

Ibilbide instituzionala oraino luzea da. Testuak Frantziako Senatuaren etapa gainditu behar du orain; jakina da Senatuak gisa honetako bilakaerekiko uzkur jokatzeko joera duela. Ondotik, Kongresuaren onespena ere lortu beharko du. Mugarri horiek erronka handia dira. Halere, Korsikako herriak erakutsi du prozesu hau bururaino eramateko duen determinazioa. Huts eginez gero, urte luzez adierazitako frustrazio legitimoak berriz ere areagotzeko arriskua handia litzateke.

Bestalde, EHBaik parlamentuko eztabaidetan agerian gelditu diren joera jakobinoak deitoratzen ditu, Frantziako klase politikoaren zati batean oso erroturik segitzen baitute. Korsikaren kasutik harago, eztabaida horiek agerian uzten dute beharrezkoa dela Frantziako Estatuaren antolaketari, boterearen banaketari eta estaturik gabeko lurralde zein nazioen lekuari buruzko sakoneko eztabaida bat idekitzea. Gogora dezagun IPSOS Institutuak eta R&PS federazioak 2025ean egindako inkestaren emaitzei jarraikiz, frantsesen %90ek uste dute Estatu zentrala tokiko errealitateetatik oso aldenduta dagoela.

Azkenik, Korsikan abian den prozesuak oinarrizko printzipio demokratiko bat oroitarazten digu: bilakaera instituzionalek denboran eta iraunkorki lurralde baten gehiengoaren sustengua dutenean, borondate hori entzuna eta errespetatua izan behar da. Printzipio horrek Korsikarentzat balio duen gisa berean, beren nahia demokratikoki adierazten duen gehiengo bat den toki guzietan aplikatu beharko litzateke.

EHBaik bere elkartasuna adierazten dio Korsikar herriari, egun bere historia politikoaren une gako bat bizi baitu. Arretaz jarraituko ditugu prozesu honen ondoko urratsak; izan ere, itxaropena ekartzen diete aitortza, demokrazia eta autonomia handiagoa nahi dituzten herri eta lurralde guztiei. EHBaik 2024an Euskal Herriarentzat aurkezturiko Autonomia Proposamenak gaurkotasun osoa duela adierazten du eta euskal eragile zein hautetsi guziei deia luzatzen die Ipar Euskal Herriaren estatus politikoaz eztabaida egin eta adostasunak eraikitzera.

✨ Urte berri on eta 2026rako mila zorion!

Badira kantuak gure baitan halako ximikoak pizten dituztenak. Horietako bat da Xabier Leteren Izarren hautsa, gure existentziaren zentzua eta mundu honetan dugun lekua aztertzen dituen obra indartsua.

Aurten, musikaz helarazi nahi dizkizuet nire desiroak, kantu eder honek inspiratuta. Gogorarazten digu, garai zailenetan ere, pausoz pauso aintzina eginez gauza handiak lor daitezkeela.

2025ean elkarrekin egindako bideari begira, dinamika kolektibo honetan segitzea opa digut, energia, elkartasun eta engaiamendu berarekin. ✨

Krisi politikoa frantses estatuan: erantzukizunez jokatu, interes orokorraren alde

Ezjakintasunak markatzen du sartze politikoa. Lehenik Michel Barnier eta gero François Bayrou Matignonen izendatu ondoren, Emmanuel Macronek 2024ko uztaileko hauteskunde legegileen hirugarren itzulia berriz jokatuko du, Bayrouren gobernua irailaren 8an erortzen bada. Gehiegi irauten ari den blokeo eta krisi politiko zein demokratiko egoera honen aurrean, EHBaik eragile politiko guztien ardura eskatzen du, behingoz aterabide bideragarri bat aurkitu dadin.

Astelehenean, irailaren 8an, Frantziako Asanblea Nazionalaren konfiantzazko bozkari aurre eginen dio François Bayrouk. EHBaiko Peio Dufau diputatuak lehen ministroak eskatutako konfiantzaren aurka bozkatuko du, kontzientzia osoz. Izan ere, François Bayrou izendatu zutenetik, EHBaik gogor salatu du bere austeritate politika, klase herrikoi eta ertainak eta kolektibitateak kolpatzen dituena. Onartezina da aberats eta enpresa handiei ekarpena eskatzeari uko egiten segitzea. Anartean, babes sozialean eta zerbitzu publikoetan sekulako murrizketak iragartzen diren bitartean, onartezina egiten zaigu gerletarako eta armatzerako Gobernua emendatzen ari den diru zama izugarria. Honek erakusten du dirua badela, baina afera da diru hori zertan ari den erabiltzen.

Gobernua proposatzen ari den neurriak berriz ere herritarrak kaltetuko ditu. Ipar Euskal Herriari dagokionez, gainera, murrizketa hauek eragin zuzena izanen dute tokiko kolektibitateen bizian, euskararen arloan edota euskal kulturan. Hori Ipar Euskal Herriko biztanleen borondatearen kontra doa: R&PSentzat IFOPek egindako “Radioscopie du régionalisme en 2025” inkestaren arabera, biztanleen %82 euskararen koofizialtasunaren alde daude, eta %62 Ipar Euskal Herriaren estatus bereziko kolektibitate bat sortzearen alde.

Herritarren ahotsa mespretxatzeak ondorioak ditu. “Dena blokeatu dezagun” mugimendua eta datorren irailaren 10 eta 18rako deituak diren mobilizazioak horren adierazle dira. Hauteskundeetara deitzeak eta gero haien emaitzak ukatzeak, edota sindikatu eta manifestazio jendetsuak kontutan ez hartzeak, benetan zilegia den haserrea eragiten du: herritar eta lurraldeen interesak dira aurrekontuaren lanketa gidatu behar dutenak, denen ongizatea bermatzeko eta tokiko kolektibitateei botere eta baliabide ekonomiko gehiago emateko.

Peio Dufau eta bere taldeak zentzu horretan lan eginen du Finantza Lege Proiektuaren sekuentzia osoan, besteak beste, osasuna, euskara eta zerbitzu publikoak lehenetsiz, oso egoera kritikoan daudenak gaur egun Ipar Euskal Herrian. Gisa berean, EHBaik irailaren 10ean eta 18an deituak diren mobilizazioak sostengatzen ditu, eta Euskal Herrian antolatzen segitzeko deia egiten du, haserrea azkenean entzuna izan dadin eta aitzinatzeko aukera eman dezan, adimen onez, interes orokorraren alde.