Eskuin muturraren aurkako mobilizazioa Donibane Lohizunen

“Eskuin muturraren aitzinean, harresia eraiki” lemapean, EHBaik eskuin muturraren aitzineko mobilizazioa eginen du heldu den azaroaren 14an ostiralarekin, arratsaldeko 19:00etan, Donibane Lohizuneko herriko plazan (Louis XIV).

Gogora ekarri nahi dugu, joan den urriaren 2an Lapurdiko kostaldeko herrian EHBaik ekintza bat egin zuela Pierre-Édouard Stérin eskuin muturreko milioidunaren bigarren etxebizitzan. Salmenta espekulatiboa salatzearekin batera, eskuin muturreko indarren eta ideien aitzinean harresi bat eraikitzeko beharra azpimarratu genuen.

Biharamunean, hedabideetara igorritako agiri batean, Stérinek EHBairen eta bi bozeramaileen kontrako salaketa ezarri zuela iragarri zuen publikoki. Gaur gaurkoz, ez dugu salaketa horien berri gehiagorik. Edozein gisaz, iragarri genuen bezala, prest gara aurre egiteko. Are gehiago, prest gara eskuin muturra eta bere ideia atzerakoien aitzinean mobilizazioa zabaltzen segitzeko.

Donibane Lohizunen eginen dugun mobilizazioak, bistan dena, salmenta espekulatibo horren, ekintzaren eta salaketaren testuinguruarekin lotura du. Baina deialdiak haratago joan nahi du, eskuin muturraren mehatxuaren aitzinean alerta piztu eta herritarrei beren kezka eta ezinegona karrikan agertzeko aukera eman nahi diolako. Historian gertatu den bezala, faxismoari determinazioarekin, batasunetik eta herritarren aktibazioaren bidez aurre egiten ahal zaio soilik.

Eskuin muturraren mehatxua Ipar Euskal Herrian ere

Mundu mailan bizi dugun agenda erreakzionarioaren testuinguruan, Frantziako Gobernua, bere politika ultra-liberal eta sekuritarioarekin gero eta gehiago, eskuin muturraren agenda besarkatu eta eskuin muturraren hedapena hauspotzen ari da. Maleruski, Ipar Euskal Herrira ere haize erreakzionarioak ailegatzen ari dira.

Eskuin muturrak boterea hartu edota erabakiguneetan sartzea lortzen badu, egun ezagutzen ari garen eskubideen gibelapena anitz azkartuko da: politika ultra-liberalen bidez zerbitzu publikoen eta babes sozialaren suntsitzea; aberatsenei pribilegio gehiago; emazteen eskubideak babesteko neurrien ezabatzea; trantsizio ekologikorako politikak bertan behera uztea; migratzera behartuak diren pertsonen kontrako politiken gogortzea; ildo errepresiboaren emendatzea; adierazpen askatasuna zein elkartegintza arriskuan ezartzea; Euskal Herriaren identitatea, euskara eta euskal kulturaren kontrako oldarraldi berria…

Ideia arrazista, xenofobo, homofobo, totalitario eta faxisten hedapenak elkarbizitza oztopatzea eta jendartea zatitzea eragiten du. Eta hori da dugun beste arrisku handiena, hots, Ipar Euskal Herrian azken urteetan eraiki duguna eta eraikitzen ari garena suntsitzea. Ondorioak lurraldeak eta herritarrek pairatuko dituzte.

Euskal Herrian harresia eraiki eta itxaropena sortu

Egoera honen aitzinean, Euskal Herriaren identitatea, balore aurrerakoi zein berdinzaleak eta azken urteetan eraiki ditugun kontsentsuak eta jendartearen atxikimendua babestea lehentasun osokoa da. Hots, bake prozesua eta elkarbizitza, euskararen garapena, trantsizio ekologikoa, emazteen eskubideak, migrazio politika humanista bat, laborantza herrikoia, etxebizitza eskubidearen aldeko lana… Elkarrekin eraikitakoa elkarrekin babestu behar da.

Hori dela eta, eskuin muturrari eta bere ideia faxistei batasunetik erantzun behar zaie. Urteetan ideia batzuen inguruan ados jartzeko gai izan garen ber, prest izan behar dugu gure lurraldea defendatzeko eta gure jendartea babesteko. Afera ez da kontrakotasun hutsean geratzea. Erronka, Euskal Herria eta bere jendearen alde egitea da. Horretarako, eragile sozial, sindikal eta politiko guzien erabaki eta ekimen konkretuak behar dira.

Izan ere, marrazten ari zaizkigun marrazki ilun honen aitzinean, uste dugu itxaropenaren bandera altxatzea premiazkoa dela. Itxaropena Euskal Herriak eta herritarrentzat zein belaunaldi berrientzat eraiki behar dugun etorkizun hobeak sortzen dute. Etorkizun hori dugu jokoan eta ezin dugu hutsik egin. Horregatik, azaroaren 14an herritarrak Donibane Lohizunen elkartzera deitzen ditugu.

Kanakyarekin ELKARTASUNA! Solution politique pour la KANAKY !

Joan den astean, Estatu frantsesak, indarrean dagoen konstituzio aldaketaren baitan, Kanakyako hautesle zerrendaren erreformaren alde bozkarazi du, nahiz eta Kanakyako deskolonizazio prozesuko aktore eta behatzaile guztiek, erreforma hau tentsio eta “Noumeako Akordioen” haustura puntu gisa adierazi zuten.

Erreforma horren onartzeak, 1998an bi aldeek izenpeturiko “Noumeako Akordioaren” deusestatzea ekartzen du eta Kanakyaren deskolonizazio prozesu adostua zangotrabatu.

Lege aldaketak bidez Kanakyan 10 urtez bizi izan den pertsona orori bozkatzeko eskubidea ematen dio eta ondorioz, erroldan Kanakiarrak gutxiengo bilakatzeko arriskua handitzen du. Azken hori zen, Noumeako akordioak saihestu nahi zuena.

Kanakian gatazka eta tentsio iturri jarraitzen izaten du erroldaren osaketak. Mugimendu independentistak proposamen bat egin zuen, erroldan Kanakian sortu herritarrak soilik integratzeko. Frantziako gobernuak proposamena baztertu zuen eta kontsentsurik gabe konstituzioaren erreformaren bidea hartzea erabaki zuen.

Benetako indar kolpea, parlamentari frantziarren gehiengoak babestua, Noumeako akordioak eta kanakiarren autodeterminaziorako eskubidea berriro haustea dakarrena. Estatu frantsesa da gaur egun, Kanakyan dagoen indarkeria giroaren erantzule.

EHBai eta LABek Macron-en eta haren gobernuaren jarrera irmo salatu nahi dugu.

Kanakyako gatazka politikoa ezin da indarrez konpondu, Frantziar estatuak deskolonizazio prozesua bururaino ereman behar du. Zinezko konponbidea soilik posible izanen da, Kanakiarren eskubidea eta borondatea errespetatzen dituzten urratsak egiten badira.

Deskolonizazio prozesuaren aurkako erabaki batek, ondoko urratsak baldintzatuko ditu eta tentsio iturri larria izanen da.

Horretarako, hautesle zerrendaren erreformaren berehalako deuseztapena eman eta Noumearen akordioen baitan elkarrizketari berriro ekin beharko zaio.

Bukatzeko, gure sustengu eta babes osoa adierazi nahi diogu Kaniar herria zein Kanakiarrei eta Frantziar estatuari, bere ardurak hartu eta erreforma bertan behera uzteko exigitzen diogu.

Zuzi olinpikoa Euskal Herrian: Euskal Herria Nazio bat da

Hemen duzue, EHBaik joko olinpikoaetaz egiten duen irakurketa.

Gernika-Palestina: Oroitu eta ekin

Apirilaren 26an beteko dira 87 urte, frankisten aginduz, nazien Kondor Legioak eta Italiar faxisten hegazkinek Gernika bonbardatu zutenetik. Altxamendu faxistaren ondorengo gerla zibilean, sarraski honek 2.000 hildako inguru utzi zituen, Bizkaiko herria osoki suntsituz. Geroztik, Euskal Herrian eta munduan sinbolo bilakatu da Gernika. Urtemuga hau mundu mailako testuinguru beliko bortitz batean heldu da aurten, horien artean bereziki azpimarragarria delarik Israel Palestinan egiten ari den genozidioa.

Hori dela eta, EHBaik “Gernika-Gaza: oroitu eta ekin” hitzaldia antolatu du apirilaren 26an, ostiralarekin, 19:00etan, La Perle gelan (Hiriburu). Gure artean izanen dugu Elias Sanbar historialari, poeta eta saiakeragilea, 2005 eta 2021 artean UNESCOn Palestinaren enbaxadore izan zena. Palestinan sortua, Eliasek 15 hilabeterekin joan behar izan zuen Libanora bere familiarekin, Israelgo estatuaren aldarrikapenaren ondotik. Gerora, Frantses Estatura joan zen. Beti izan du sorterria bihotzean eta orain dela 30 urte, Osloko bake prozesuan negoziatzaile gisa parte hartu zuen.

Elias Sanbarren presentzia eta begirada Euskal Herrian ukaitea garrantzitsua iruditzen zaigu Israel Palestinan azken hilabeteetan egiten ari den sarraskia eta oro har Palestinar Herriak pairatzen duen zapalkuntza ulertzeko. Gogora dezagun, joan den urrian Hamasek egin erasoaz geroztik, Benjamin Netanyahuren agintepean, 34.000 pertsona baino gehiago erail dituela Israelek, gehienak haurrak eta emazteak. Ospitaleak, eskolak eta oro har Gazako hiriaren suntsiketa izugarria ezagutzen ari gara bonbardaketa indiskriminatuen ondorioz. Gosetearen arriskuaz ohartarazi dute giza eskubideen aldeko erakundeek. EHBaik gogor gaitzetsi nahi du Gazan indarrean den genozidioa eta elkartasun osoa helarazi nahi dio Palestinar Herriari.

Gauzei beren egiazko izenez deitu gabe denbora aitzina egiten uzteak, konplize bihurtzen gaitu. Genozidio baten aitzinean gaudelako, apartheid sistematiko baten aitzinean. Horregatik, EHBaik uste du presioa beharrezkoa dela Israel egiten ari den sarraskia geldiarazteko eta behin betiko su-etena, okupazioaren amaiera eta Palestinaren askatasuna aldarrikatzen ditugu.