EHBai Baionak, denei irekia izanen den egun bat antolatzen du heldu den apirilaren 27an, larunbatarekin, Baionako Biltxoko elkartean (Augustins karrika). Abertzaleak proposamenak egiten dituen indarra gara hiriaren bizian, eta, beraz, hitzaldi eta eztabaida bat eskainiko dugu arratsaldeko 16:00etatik aitzina Baionako beste eredu berri bat posible dela azpimarratzeko.
Baionako bestak eta oro har Baionan gaindi antolatzen diren bestak izanen ditugu ardatz, urtez urte izan duten garapena kontuan hartuz. Besta horiek ezaguturiko garapena eta hobetzeko ardatzei aterabideak bilatzen saiatuko gara, baionarrek zein inguruko biztanleek ospakizun horiek berreskuratu ditzaten.
Hizlari hauek izanen ditugu gure artean:
• Zaloa Basabe. Iruñeko genero berdintasunaren hautetsia denak, San Ferminetako esperientzia ezagutaraziko du.
• Philippe Steiner. Sorbonako soziologiako irakasle emeritua eta Frantziako Unibertsitate Institutuko ohorezko kidea. « Faire la Fête, sociologie de la joie » liburuaren idazlea da. Baionako Bestek historian zehar izan dituzten arazoen berri emanen digu, bai eta bestaren dimentsio ezberdinen berri eskaini ere.
• Michaella Clapisson. 2032 kolektiboko kide bat. Baionako elkarte kolektibo hau iazko besten ondotik sortu da, eta egungo ereduari alternatibak proposatzen dizkio. Kolektiboaren sortzearen arrazoiak, gaur egungo egoeraren azterketa eta hobekuntza pistak emanen dizkigu.
Eztabaidaren ondotik, solasaldia segitzeko parada izanen da Biltxokon bertan, pintxo eta trago artean.