Lehenik eta behin, EHBaik arduratsu jokatzeko deia egin nahi du. Uste dugu Marieniako laborantza lurren inguruko auzia konpondu gabe usteltzen uzten den heinean, tentsioa handitzen ari dela. Arduragabekeria da elkarrizketa guneak eraiki eta aterabideak atzeman ordez, gatazka hau mugagabeki luzatzen aritzea. Maleruski, Kanboko herriko etxean izan diren gertakari tamalgarrietara iritsi da egoera, inoiz gertatu behar ez zen horretara. Eta horrek ez dio inori mesederik egiten.
Egoera honetan, gertakariak bere lekutik ez ateratzeko beharra azpimarratu nahi dugu. Kanbon iragan denak, hautetsien edo instituzioen kontra lehenago izan diren beste batzuekin lotzeko tentaldia baztertu behar da. Gauzak orokortu nahi izatea jendartean nahasketa sortu nahi izatea dela deritzogu. Izan ere, Marieniako laborantza lurren defentsa laborariek beren lanbidearen eta sektorearen etorkizunaren alde egiten duten borroka baita, ez hautetsi edo instituzioen kontrako borroka bat.
EHBaik berretsi egiten du Marieniako laborantza lurretan etxebizitzak eraikitzearen kontra dagoela eta beraz, bat egiten duela lur horien defentsarako aldarrikapenekin. Borroka hori bide baketsuetatik jarraitzearen alde egiten du argiki, orain arteko mobilizazio eta ekimenekin izan den bezala.