EHBaik atzoko atxiloketa salatzen du

Frantses polizia judizialak Patxiku Guimon atxilotu zuen atzo. Atxiloketa gogorki salatu eta onartzezinatzat jotzen dugu.
Bakearen kontrako gertakari honen aitzinean, gure sustengu osoa adierazi nahi diegu Patxiku zein bere familia eta gertukoei.

Atxiloketa hau, joan den irailaren 22ean, Pariseko auzitegiak Jakes Esnal eta Ion Kepa Parot askatzearen aldeko deliberoaren biharamunean kokatzen da. Honek, argiki erakusten digu, fiskaltza anti terrorista, Ion eta Jakes-en baldintzapeko askatasunen okazioa errepikaraztera eramaten zuen logika berean dagoela oraindik. Atzoko atxiloketak, gaur egun oraindik mendekuan oinarritutako politika indarrean dagoela erakusten digu.

Atxiloketa zein jokaera horiek jokoz kanpo dira. Bake iraunkor eta integrala lortzerako bidean, behar beharrezkoa da preso eta iheslariak etxeratzeko bide orria marraztu eta aplikatzea eta atxiloketekin bukatzea betirako.

2011az geroztik, Euskal Herriak, bakearen aldeko apostua egin du eta bere esku artean duen guzia egin du zentzu horretara doazen urratsak egiteko. Honen parean, errepresioan eta mendekua oinarritzat dituzten atxiloketa horiek ez dute izaterik.

Hori dela eta, gaur Ziburun arratsaldeko 19:00etan eginen den elgarretaratzean parte hartzera deitzen dugu.

AZKENEAN ASKE !

Azkenean! Gaur, urte luzeetako lanaren ostean, Jakes Esnal eta Ion Kepa Parot aske gelditzen dira. Poz handia eragiten digun berria da.

Orain dela bi urte, Xistor aske gelditzen zen eta gaurkoan, auzitegiak Jakes eta Ionen baldintzapeko askatasunak onartzearen alde egin du. Urtez urte Euskal Herriko gehiengo zibil eta politikoak egindako apostuaren emaitza da gaurkoa. Urtez urte eta mobilizazioz mobilizazio lortu dugu 32 urte preso daramaten Jakes Esnal eta Ion Parot askatzen.

Anitza izan dira 2011an, Aieten burututako Naizoarteko bake konferentziatik, Euskal Herriko jendarte zibil eta politikoak bake prozesuaren alde egindako urratsak. Bidea luzea eta korapilatsua izan da baina Herri honen determinazioari esker lortu dugu.

2017an, ETAk armagabetzea burutzea deliberatu zuen jendarte zibilaren eskutik eta horren ondotik, bere disoluzioa iragarri zuen. Honen aitzinean, Frantziar eta Espainiar estatuaren jarrera korapiltasua izan ditugu. Hasiera batean, presoen hurbilketak burutzen hasi baziren, Frantziar estatua berehala blokeo egoera batean jarri zen. Euskal Herritik ulertu eta onartzen ez zen blokeo egoera bat.

Bake prozesua, preso eta iheslari politikoen itzulera gabe ezin da burutu eta gaurkoan, bake prozesuaren aldeko urrats bat ezagutu dugu. Mobilizazioen emaitza zuzena dugu gaurkoa. Mobilizazioei esker lortu dugu eta horregatik, heldu den urriaren 8an SAREk Donostin antolatuko duen mobilizazioan parte hartzeko deia egiten dugu.

Lortu dugu, Euskal Herriak lortu du Jakes eta Ion etxeratzen.

Ongi etorri zuen herrira, besarkada estu bat beren lagun eta senideei.

Azterketak euskaraz orain!

Azterketak euskaraz pasatzeko aldarria ez da zerbait berria. Aldarri berria ez den arren, azken urtean zentzu gehiago hartu du. Urte luzez, Seaskako irakasle, ikasle eta guresoek aitzina eramandako lanari esker gai batzuk euskaraz pasatzeko eskubidea lortu zen. Azterketak bere osotasunean euskaraz pasatzen ahal ez baziren ere, urrats bat zen. Hobetzera joanen zen eskubide bat izanen zela espero genuen. Ipar Euskal Herriko gehiengoak, euskara eta bere ikaspenaren alde egiten du beraz ezin pentsatua zen, atzera eginen genuenik. Baina maleruski, pentsa ezina zena gertatu da eta lortutako aitzin pausua guztiz urratu da. Azterketak euskaraz pasatzeko eskubidea oraindik gehiago urratua izan da eta Seaskatik pasatzen diren ikasle guziek azterketak frantsesez pasatzera behartuak dira.

Ez da euskarak bizi izan duen kolpe bakarra. Anitzak izan dira murgiltze sistema oztopatzeko jasandako oztopoak. Frantziar asanblada naizonalean bozka bidez onartu zen Molac legea datorkigu burura. Behin onartu eta, Kontseilu Konstituzionalak helegitea jarri zuen. Haserre handia sortu zuen berria izan zen. Haserrearen hein bereko mobilizazioak bultzatu zuen Hezkuntza ministeritza zirkular bat ateratzera non hizkuntza gutxituen murgiltze irakaskuntza ontzat jotzen zuen, frantsesaren eta hizkuntza gutxituaren «maila bereko ezagutza» bermatzen baziren.

Mobilizazioaren arrakasta eta garrantzia azpimarratu behar ditugu. Azterketak euskaraz kolektiboak iaz hasitako bide mobilizatzailea txalotzeakoa da. Urratsez urrats mobilizazio desbedinak egin dituzte ikasleen eskubidea babesteko. Manifestaziotik, okupaziora arte hartutako bideak bere fruituak ekarri ditu.

Joan den asteazkenean, Baionako ikuskaritza zentroa okupatzera joan ziren, ikasle, irakasle eta gurasoak. Mobilizazio arrakastatsua. Baina honen aitzinean, gobernuak izandako jarrera deitoratzen dugu. Polizioak, bertara hurbildu zirenen kontra erabilitako bortizkeria onartezina da.

Frantses gobernuaren inmobilismoaren parean, tokiko instituzioek beren ardurak hartu dituzte eta aldarria babesteko urratsa eman dute. Euskal Elkargoak, Seaskako ikasleek euskaraz erredaktatuko dituzten azterketak berreskuratuko ditu eta zuzenduak izateko dispositoboak emanen ditu.

Azken honek, tokiko instituzioen beharra eta garrantzia azaleratzen ditu. Herritarrengandik hurbilen diren instituzioek dute hobekien erantzungo bertako arazo eta problematikei. Zentzu horretan -eta estatus bereziko lurralde kolektibitate baten bidean-, deia existitzen den Euskal Elkargoari kopetentzia gehiago ematearen beharra azpimarratzen dugu.

Mobilizazioak emaitza positiboak ekartzen ditu eta horretan segituko dugu gure eskubideak errespetatuak izan arte. 2022. urtean ezin pentsatua da oraindik ere euskara eta bere erakaspenaren kontrako erasoak pairatzen segitzea. Euskara legez babestu behar da euskaraz bizi ahal izateko. Guk bide hori segituko dugu eta horren alde eramanen diren dinamika eta mobilizazioen ondoan izanen gira.

Hauteskunde legegileen emaitzak ezagutu ditugu igandean

Frantziako lehendakaria den Emmanuel Macronek, ez du gehiengo osoa izanen Frantziako Asanblada Nazionalean datozen bost urteetan. Guk, ezkerreko mugimendu gisa, Macronek gehiengorik ez izateak sortzen digun poza ezin dugu ukatu. Izan ere, azken bost urteetan etengabeko haustura sozial eta ekologikoaren ildotik eramandako bide berdina ezingo du segitu. Argi eta garbi diogu berriz ere, EHBai Frantses lehendakariaren gehiengoaren parean kokatzen dela.

Hala eta guztiz ere, eskuin muturraren gorakadak sortzen digun kezka aipatu behar dugu. Asanblada Nazionalean indarrez sartu dira. Honek gure indarrak biderkatzera eramanen gaitu eskuin muturrak defenditzen eta aitzina eramaten dituen ideiak oztopatzeko. Hemendik goiti, eta jasoko duten diru publikoari esker, beren mugimendua sendotzeko aukera izanen dute. Ezkerreko beste alderdiekin batera lanean jarriko gira beraiek defenditzen duten bidearen parean beste alternatiba bat existitzen dela argiki erakusteko. Baina horretarako eskuina zein zentroa ere gogor aritu beharko dira eta beraien ideiak inposatzeko bide txikiena ere ez diete utzi beharko. Ez dugu eskuin muturraren jendarte zatikatzaile eta estigmatizaturik nahi.

Bestalde, zoriontzekoa da “Libertés et Territoires” taldeko diputatuak berriz hautatuak atera izana. Bretainia eta Korsikatik izendatuak izan diren diputatuei esker, lurraldeen autonomia, tokiko hizkuntzak edota etxebizitza bezalako gaiak Parisera eramaten ahalko ditugu, elkarlanean. Bide beretik, DOM-TOMetatik ateratako diputatuak zoriontzen ditugu. Ahots berri bat gehiago Parisen! EHBairi dagokionez, Régions et Peuples Solidaires (R&PS) federazioarekin hartutako engaiamendua berresten dugu eta estaturik gabeko herrien artean lanean segituko dugula azpimarratzen dugu.

Ipar Euskal Herriko emaitzei dagokionez, Iñaki Echaniz, Florence Lasserre eta Vincent Bru-ren garaipenen aitzinean gira. Gure mugimenduak bigarren itzuliari buruzko konsignarik ez eman arren, NUPES mugimendua osatzen duten hautagaiak desberdintzen genituela nabarmendu genuen. Ezkerreko alternatiba, ezin da EHBai aintzat hartu gabe egin, ez eta ere gure proiektua definitzen duten gaiak kontutan hartu gabe: abertzalea, ezkertiarra, feminista eta ekologista den proiektua kondutan hartu gabe.

Orain, gehiengoak eraiki behar ditugu karrikan, gure lorpen sozialak defendatzeko eta tokian tokiko alternatiba burujabeak eraikitzen segitzeko. Kanpainan zehar erabili dugun “Gure esku” lemak gaurkotasunean segitzen du. Hitzordu garratzitsuak izanen ditugu Ipar Euskal Herriko agenda politikoan eta aktiboki parte hartuko dugu!